لقد طار خبر المؤتمر في كل مكان وبدأ شباب الإخوان يتحدثون عنه بين متهيب ومقبل ومشارك ومحجم، وطارت أوراق ورش العمل إلى مكتب الإرشاد قبل لقاءنا بالدكتور محمود أبو زيد والدكتور محيي حامد والدكتور عبد الرحمن البر.
بدأالإجتماع صادما حيث فاجئنا الدكتور محي بأنه لا حاجه لعمل المؤتمر ودار الحوارالتالي:
د.محيي: جميله مبادرتكم وإحنا هندرس ورق العمل ومفيش داعي لعمل مؤتمر.
فقلت: إزاي ؟! إحنا اتفقنا إننا نعمل مؤتمر ده اللي على أساسه جمعنا الناس وعملنا ورش عمل وتواصلنا مع المجموعات اللي ردود أفعالها صعبه، إحنا ألتزمنا باللي قلناه.
د.محيي: انتوا عايزين تناقشوا في المؤتمر علاقة الحزب بالجماعه والجماعه يكون لها حزب ولا لأ ؟ الكلام ده فات معاده فبلاش تضييع وقت واحنا شايفين إن مش من المصلحه عمل المؤتمر.
فقلت: إيه اللي فات معاده إحنا بناقش قضية لسه هتطرح على مجلس الشورى عشان يقررها، إيه المانع إن يكون في رأي تاني؟
د.محيي: it is too late
فقلت: مش فاهم !!
د.محيي: يعني في قرار مجلس شورى من التسعينات بعمل حزب.
محمدعقل: إحنا مش في التسعينات يا دكتور إحنا بعد ثورة والوضع والمستجدات اتغيرت.
محمد نور: هو مش ممكن مجلس الشورى يتخذ قرار غير بتاع التسعينات؟
د.محيي: خلونا نتكلم بصراحه انتوا عايزين تعملوا علينا لوبي وتضغطوا علينا، إحنا مبيتلويش دراعنا. لو تخيلنا إن في الجماعه 300 ألف شاب كام واحد منهم هيحضر المؤتمر ده؟ إحنا كل يوم بيجيلنا إقتراحات، إشمعنا إقتراحاتكم اللي عايزين يتعملها مؤتمر خاص؟
فقلت: لا يا دكتور ده مش شغل لوبي، اللي عايز يعمل لوبي ميجيش مكتب الإرشاد ويطلعكم ع التفاصيل خطوة بخطوة.
محمد نور: ليه مؤتمر خاص؟ إعملوا عشرات المؤتمرات كل مجموعه عندها مشاركه وإضافة تنظم مؤتمر وترفع التوصيات. إنتوا ليه مش عايزين يكون في آراء أخرى؟
فقطع الكلام الدكتور عبد الرحمن البر قائلا: انتوا عايزين توسعوا دائرة اتخاذ القرار؟
فقلت: هو احنا هنا عشان نناقش الموضوعات دي ولا ترتيبات وموعد المؤتمر يا دكتور محمود ولا في نية حقيقية لإلغاء المؤتمر؟
فأكمل الدكتور البر: انتوا مشكلتكوا إنكوا بتفرقوا بين الديني والسياسي، يعني بالنسبة لكم لايمكن لرجل شيخ زيي يتولى وزارة من الوزارات السيادية.
فقلت على سبيل المجاراه: ينفع لو أنت من أهل الكفاءة بس ده مش موضوعنا.
فقطع محمد عقل الكلام: لأ يا دكتور مينفعش، انتوا ليه عايزينا نبقى برأي واحد، محدش قال فصل دعوي وسياسي، إحنا بنتكلم ع الأصلح واحنا اتفقنا على كده.
د.محيي: واحنا غيرنا رأينا وشايفين إن المؤتمر مش الأصلح.
فنظرنا للدكتور محمود وقلنا: إيه معنى الكلام ده يا دكتور؟
فرد دكتور محمود وقال أنا هكلمك يا محمد أنتظر مني تليفون النهارده مساء.
فخرجنامن المكتب محبطين بشدة وغاضبين ولا ندري لماذا ردة الفعل السلبية هذه؟!! وعندنا شعورشديد بالمرارة والرجوع في الكلام. ذهبت إلى البيت ولم يمر أكثر من ساعتين حتى أتصل بي الدكتور محمود وأخبرني أننا على إتفاقنا وأن المؤتمر سيعقد كما أتفقنا وكما وعدناكم سنوفي.
فقلت له: يعني أرتب الحجز والدعوات يا دكتور؟
قالي:أيوه، أنا أول ما قلت للدكتور محيي إننا وعدنا بالمؤتمر، قالي خلاص وأنا عندي إجتماع للمكتب بكره وهعرض الأمر على الأستاذ.
اتصلت تاني يوم بالدكتور محمود فلم يرد واتصلت في اليوم التالي أكثر من مرة فلم يرد. فرتب أحمد سلامة لقاء مع الدكتور حلمي الجزار في بيته. ذهبنا وتناقشنا حول الجماعه ووضعها والمؤتمر والأحداث وأخبرنا أن الإعلان عن الحزب غالبا سيكون في أول شهر 4 وأخبرنا عن الإتجاه الإصلاحي داخل الجماعه.
وأخبرته عن المؤتمر وما حدث وأن دكتور محمود لايرد فقال لي: طالما قالك كمل المؤتمر خلاص كمل، قلتله: يعني أحجز؟ قالي: آه إحجز. قلتله: عايزين مشاركه قوية منك ومن الكثيرين من مجلس الشورى العام حتى يسهل نقل الأفكار وتكون المشاركه جيده. فقال: تواصلوا مع مجلس الشورى ولا تقفوا عند حدود السرية والماضي إحنا في فضاء مفتوح والدنيا متاحه للتواصل.
بدأنا التواصل مع أعضاء مجلس الشورى ودعونا الكثيرين ومنهم الدكتور عبد المنعم أبوالفتوح والدكتور محمد حبيب أعضاء مجلس الشورى والدكتور عصام العريان والدكتور حلمي والدكتور جمال حشمت وغيرهم.
دعونامن خارج الإخوان الدكتورة هبه رؤوف وكنا نريد دعوة المستشار البشري والدكتورة نادية ود.عمرو الشوبكي والدكتور العوا ليشاركوا في ورش العمل ويساهموا في تنقيح الأوراق والإدلاء برأيهم ومشوراتهم.
كان الحجز في فندق سفير يوم السبت الموافق 26 مارس أي أن لدينا أسبوع للتجهيزات، واخترنا يوم السبت لأنه الموعد الثابت لإجتماع مكتب الإرشاد ما يعني أن أغلب الأعضاء أوقاتهم متاحه في هذا اليوم وهذا كان حوار سابق عن اي الأيام أنسب مع الدكتور محمود.
كنت على موعد أنا ومحمد نور مع دكتور أبو الفتوح في نقابة الأطباء لدعوته وقد أخبرناه عن المؤتمر وعرضنا عليه الفقرات كما كنا نفعل مع كل الشخصيات وقد ساعدنا في التواصل مع الدكتور محمد عمارة ليقول كلمة المؤتمر عن الفكر السياسي عند الإمام البنا.
كل هذه الأيام وأنا يوميا أتواصل مع دكتور محمود وهو لا يرد، ثم هو الذي أتصل وكان غاضبا فقلت له: المؤتمر يوم السبت يا دكتور. فقال لي: كيف تتخذ موعد دون الرجوع إلي؟ قلتله: إنت قلتلي رتب أمورك وكمل التجهيزات ولم يبقى سوى الحجز، وإيه مشكلة يوم السبت ؟
قالي: لأ السبت مش مناسب. قلتله: بس ده يوم الإجتماع لمكتب الإرشاد وبيبقى مناسب للجميع، مش هيكون متاح أي حد من مكتب الإرشاد يحضر؟!
قالي: عدي عليا في العيادة النهارده ضروري يا شمس.
كنا في اتحاد الأطباء فبالصدفة وجدت دكتور عصام وكان على علم بالمؤتمر ويعرفني ومحمد نور فسألتله: ما الذي يحدث ؟ ولماذا حدث التغيير؟
فقال: في اتجاه داخل المكتب مش عايزين المؤتمر يتم.
قلتله: والعمل؟ قالي: معرفش، روح للمرشد. قلتله: طب والإتفاق؟ قالي: روح للمرشد واحكيله وخد منه موافقه، الموضوع اتعرض قبل كده وبعد كده الدنيا أزمت.
قلتله: أروح للمرشد فين؟
قالي: صلي معاه المغرب في مسجد الإخشيد هيكون هناك واتكلم معاه.
كلمت دكتور جمال حشمت فقالي إنه جاي ع النقابة فانتظرناه واتكلمنا، قالي: اعرضوا عليهم إلغاء دعوة الإعلام واطلبوا حضور المرشد وسايسوا عشان الموضوع يتنفذ.
قلتله: يا دكتور عشان أكون صريح إحنا مخدناش خطوة من غير معرفتهم، وموضوع الحجز مش هوالسبب. لو في نية لإلغاء المؤتمر أنا هعلن ده للناس، على الأقل اللي شاركوا في ورش العمل لكن مطوحة الموضوع لغاية ما يتم إعلان الحزب عيب بصراحه!!
قالي: حاول بس مع المرشد وشوف الدنيا وقولي.
ذهبنا لمسجد الإخشيد للقاء المرشد وللمفاجأة الجميلة كان الدكتور محمود أبو زيد هناك...
يتبع في الحلقة القادمة
------------------------------
الحلقة الأولى: http://wa3yena.blogspot.com/2013/04/blog-post_9367.html
الحلقة الثانية: http://wa3yena.blogspot.com/2013/04/blog-post_5589.html
الحلقة الثالثة: http://wa3yena.blogspot.com/2013/04/blog-post_16.html
ليست هناك تعليقات:
إرسال تعليق